АҚШ Украинада тинчликка эришиш режасининг асосий бандини айтади

АҚШ Украинада тинчликка эришиш режасининг асосий банди сифатида Европага Россия газини харид қилишни қайта тиклашни таклиф этмоқчи.

АҚШ президенти Дональд Трамп маъмурияти Украинада тинчликни таъминлаш режасининг асосий қисмларидан бири сифатида Европа Иттифоқига Россия газини харид қилишни қайта тиклашни таклиф этмоқчи. Бу ҳақда The New York Times газетаси манбаларга таяниб хабар берди.

Нашрнинг ёзишича, Америка маъмуриятининг режаси Европа давлатларига Россия газини анча катта ҳажмларда харид қилишни қайта бошлаш таклифини ўз ичига олади.

«Трамп маъмурияти Россия билан тинчлик келишувига эришилган тақдирда, “Шимолий оқим” сувости газ қувури фаолиятини қайта тиклашни амалга ошириш осон бўлган мақсад сифатида кўриб чиқмоқда», — дейилади мақолада.

Шунингдек, АҚШ президенти Россия ва Эронга қарши санкциялар тўғрисидаги қонун лойиҳасида назарда тутилган айрим чораларни қўлламасликка кўрсатма бергани хабар қилинди. Ушбу қонун лойиҳасида Россиядан тўғридан-тўғри импортга 500 фоизгача, Россиядан энергия ресурсларини энг кўп харид қилувчи бешта мамлакат товарларига эса 100 фоизгача бож жорий этиш таклиф қилинган эди.

Бундан ташқари, ўтган ҳафта Дональд Трамп Россия президенти Владимир Путин билан телефон орқали мулоқот ўтказган. Суҳбатдан сўнг у дизель ёқилғиси етказиб бериш бўйича йирик келишувга эришилганини маълум қилган.

Келишув доирасида АҚШ Молия вазирлиги санкциялардан вақтинчалик истисно жорий этган. Бу қарор 2027 йил 7 апрелгача амал қилиши белгиланган.

Россия бош вазири ўринбосари Александр Новакнинг айтишича, Москва октябрь ойида АҚШ ва жаҳон бозорларига 300 минг тонна, ноябрда 500 минг тонна, декабрда эса бир миллион тоннагача дизель ёқилғиси етказиб беришга тайёр.

Дональд Трампнинг таъкидлашича, мазкур келишув нафақат АҚШ, балки бутун дунё учун фойдали бўлиб, дизель ёқилғиси нархининг сезиларли даражада пасайишига хизмат қилиши кутилмоқда.