Германия Россия ёқилғисидан воз кечиб, ўз иқтисодиётига зарар етказяпти

Германиянинг «Германия учун муқобил» (АдГ) партиясидан Гамбург ландтаги собиқ депутати Олга Петерсен канцлер Фридрих Мерцнинг Россия ёқилғисидан воз кечиш позициясини танқид қилди. Унинг фикрича, бундай қарор Германия иқтисодиётига зарар етказмоқда. Бу ҳақда РИА Новости хабар берди.

Аввалроқ Мерц Россия ва АҚШ ўртасида Россия дизель ёқилғисини етказиб бериш бўйича келишувга эришилгани фонида Германия учун бундай келишув истисно эканини билдирган ва Россияга қарши санкцияларни кучайтириш зарурлигини таъкидлаган эди.

«Бу ерда савол туғилади: бу тиббий ташхис билан боғлиқми ёки қарор қабул қилишда мустақиллик йўқми? Ақли расо инсон ўз давлати иқтисодиётини барбод қилишни таклиф қила олмайди. Ёки уни манипуляция қилишяпти, ёки унда ташхис бор — иккисидан бири, учинчи вариант йўқ», — деди Петерсен Мерцнинг позициясига муносабат билдириб.

Сиёсатчи келгуси сайловларда Германия аҳолиси Москва ва Берлин ўртасидаги кескинликни камайтириш тарафдори бўлган партияларни танлашидан умид билдирди.

«Шуни тан олишимиз керакки, Россия ва унинг ресурслари Германияга Россиянинг Германияга бўлган эҳтиёжидан кўра анча кўпроқ керак», — дея хулоса қилди АдГ партиясининг собиқ депутати.

Эслатиб ўтамиз, Россия президенти Владимир Путин 9 октябрь куни АҚШ президенти Дональд Трамп билан телефон орқали мулоқот ўтказган. Трамп суҳбат давомида Россиядан дизель ёқилғиси етказиб бериш бўйича келишувга эришилганини маълум қилган эди. Унинг таъкидлашича, АҚШ Россия дизель ёқилғисини олишдан мамнун ва бундай таъминотга эҳтиёж сезмоқда.