«Реал» фанатлари жамоадан Роналдуни туғилган куни билан табриклашни талаб қилишмоқда

Бугун, 5 февраль куни Криштиану Роналду ўзининг 41 ёшини нишонламоқда. «Спортинг», «Манчестер Юнайтед» ва «Ювентус» клублари ижтимоий тармоқлардаги саҳифалари орқали собиқ футболчисини табриклаб улгуришди. «Реал Мадрид» эса ҳозирча сукут сақламоқда.

«Қироллик клуби»нинг ижтимоий тармоқлардаги бошқа постлари остида мухлислар фаоллашиб кетишди. Улар клубдан Роналдуга аталган табрикни эълон қилишни том маънода талаб қилишмоқда. Кўрамиз, «қаймоқранглилар» мухлислар фикрига қулоқ тутишармикан.

Криштиану Роналду 2009–2018 йиллар давомида «Реал» шарафини ҳимоя қилган. Ҳозирда португалиялик юлдуз «Ан-Наср»да тўп сурмоқда. Жамоа Саудия Арабистони чемпионати турнир жадвалида иккинчи ўринда бормоқда.