«Реал»дан истеъфога чиқарилган Хаби Алонсо яна Германияда иш бошлаши мумкин

Мадриднинг "Реал" клуби мураббийлигидан кетган испаниялик мутахассис Хаби Алонсо Германия Бундеслигасига қайтиши мумкин. Бу ҳақда Bild журналистлари хабар бермоқда.

Манбага маълум бўлишича, мураббийни ўз сафига қўшиб олишдан Франкфуртнинг "Айнтрахт" клуби раҳбарияти манфаатдор. Клуб спорт директори Матиас Креше Алонсо билан музокаралар ўтказишни режалаштирган.

Эслатиб ўтамиз, Хаби Германия Бундеслигасида ишлаш тажрибасига эга. Уч йил давомида испаниялик мураббий Леверкузеннинг "Байер" клубини бошқарган. Унинг қўл остида "фармацевтлар" Германия чемпиони бўлишди. Алонсо "Реал"да сўнгги ярим йилни ўтказди.