Ўзбекистон мусулмонлари идорасининг маълум қилишича, бугун — 19-июн куни Зулҳижжа ойининг 1-куни кириб келган.
Қоидага кўра, Қурбон Ҳайитининг биринчи куни Зулҳижжа ойининг 10-кунида нишонланади. Демак, катта эҳтимол билан Ўзбекистонда Арафа куни 27-июн (сешанба), Қурбон Ҳайитининг биринчи куни эса 28-июн (чоршанба) санасига тўғри келади. Бу ҳақда ҳозирча расмий хабар эълон қилинмади.
Дам олиш кунлари қандай бўлади?
2023-йилги дам олиш кунларини белгилаш тўғрисидаги Президент фармонида Қурбон Ҳайити куни 29-июнга тўғри келиши ҳисобга олинган ҳолда дам олиш кунлари белгиланган эди. Яъни 30-июн, жума куни барча учун, 1-июл, шанба куни 6 кунликлар учун дам олиш куни сифатида кўрсатилган.
Энди ойнинг вақтли кўриниши сабабли Қурбон Ҳайити 1 кун олдинроқ, 28-июнга тўғри келаётгани сабабли катта эҳтимол билан Президент фармонига ҳам ўзгариш киритилади. Рамазон Ҳайитида ҳам шундай бўлганди ва яна қўшимча 1 кун барча учун дам олиш сифатида берилганди.
Агар ўтган сафарги анъана давом эттирилса, унда ўртада очиқ қолиб кетаётган 29-июн (пайшанба) куни барча учун дам олиш куни бўлиши мумкин ва ўзбекистонликлар қуйидаги саналарда кетма-кет 5 кун дам олишади:
• 28-июн, чоршанба;
• 29-июн, пайшанба;
• 30-июн, жума;
• 1-июл, шанба;
• 2-июл, якшанба.
Ҳозирча бу бўйича расмий хабарлар йўқ.
