Қирғизистон Иссиқкўлдаги “Олтин қум”, "Дилором", "Раҳат" ва "Бустон" панционатларини Ўзбекистонга берди. Чўлпон-Отада бўлиб ўтган икки давлат ҳукуматлараро комиссияси йиғилишида шундай келишувга эришилди. Бу ҳақда "Спутник Қирғизистон" хабар қилмоқда.
Давлат мулкини бошқариш агентлигининг айтишича, ҳозирда 4 та объект ҳам рентабелсиз, айрим хоналари эса яроқсиз ҳолатда. Ўзбекистонлик сармоядорлар ҳар бир панционатга 15-20 миллион доллар сармоя киритишга ваъда бермоқда.
"Панционатлар ерлари ижара асосида берилади, бунинг эвазига ўзбек компаниялари объектларни реконструкция қилади. Бундай механизм умумеътироф этилган халқаро амалиёт ҳисобланади. Ишчиларнинг камида 80 фоизи қирғизлар бўлади. ”, деди агентлик.
Ҳокимият панционатларнинг реконструкция қилиниши вилоят иқтисодиётига кўп томонлама самара беради, деб кутмоқда: йилига 130 миллион сўмдан ортиқ солиқ, 800 иш ўрни, маҳаллий аҳоли учун тадбиркорлик имкониятлари.
Қайд этилишича, илгари ушбу панционатлар Ўзбекистон компаниялари томонидан бошқарилган бўлса, 2016 йилда Қирғизистон уларни ўз балансида рўйхатдан ўтказган.
Шунингдек, Қирғизистон президенти Иссиқкўлдаги 15 та давлат панционатини маҳаллий ва хорижий инвесторларга 49 йилга ижарага бериш ниятида эканлигини маълум қилди.
"Марҳамат, олинг. Меҳмонхоналар қуринг ва ишланг. Сармоянгиз тезда ўзини оқлайди, деган гапдан йироқман, лекин ишончим комилки, 49 йилдан кейин ўзингизга 3-4 баробар кўп қайтиб келади. Нега шундай деб сўраган фуқароларга тушунтираман: Давлат пулига меҳмонхона қуриш мумкин эмас. Мамлакатдa пул бор лекин уни узоқ муддатли бизнесга сармоя қилиш мақсадга мувофиқ эмас. Ҳаммасини ҳисоблаб чиқдик шунинг учун қурмаймиз. Инвесторларга қўйиладиган талаб: қурилишни дарҳол бошлаш керак, сублизинг тақиқланган. Агар пул бўлса, 2 йилдан кейин ҳашаматли меҳмонхона қуришингиз мумкин ", - деди Жапаров.
