Қандли ичимликлар ҳар йили 1,2 миллион юрак хасталиги ва 300 минг ўлимга сабаб бўлади - тадқиқот

Тафтс университети (АҚШ) олимлари томонидан олиб борилган халқаро тадқиқотга кўра, шакарли ичимликлар ҳар йили дунё бўйлаб 300 000 дан ортиқ кишининг ўлимига сабаб бўлади. Улар орасида 2-тоифа қандли диабетдан 80 мингга яқин ва юрак-қон томир касалликларидан 258 минг киши вафот этган.

118 мамлакатдаги 2,9 миллион кишининг парҳез маълумотларига асосланган тадқиқот шуни кўрсатдики, газланган ичимликлар, энергетик ичимликлар ва мевали ичимликлар ҳар йили 1,2 миллион янги юрак хасталиги ва 2,2 миллион 2-тоифа диабет касаллигига олиб келади. Олимларнинг таъкидлашича, бу ичимликларни ҳаддан ташқари истеъмол қилиш ҳам қондаги қанд миқдори, инсулин қаршилиги ва вазн муаммоларига олиб келади.

Айниқса, шакарли ичимликлар фаол реклама қилинадиган ривожланаётган мамлакатларда вазият кескин. Колумбияда диабетнинг янги ҳолатларининг деярли ярми уларни истеъмол қилиш билан боғлиқ, Мексикада - учдан бир қисми, Жанубий Африкада диабетнинг 28 фоизи ва юрак-қон томир касалликларининг 15 фоизи ҳам ушбу маҳсулотларни ортиқча истеъмол қилиш билан боғлиқ.

Тадқиқот муаллифларининг таъкидлашича, аҳолининг шакарли ичимликлар хавфи ҳақида хабардорлиги ўсиб бормоқда, лекин жуда секин. Олимларнинг фикрига кўра, ушбу ичимликлар, айниқса, кам даромадли ва соғлиқни сақлаш тизими ёмон бўлган мамлакатларда маркетинги ва мавжудлигини чеклаш чоралари зарур.