Путин: "Янги ядровий қанотли ракеталар ишлаб чиқаряпмиз"

Россия ядровий қанотли ракеталарнинг янги авлоди устида ишламоқда - эҳтимол улар гипертовушли бўлади.

Бу ҳақда Россия президенти Владимир Путин "Буревестник" ва "Посейдон" ракеталарини ишлаб чиқувчиларни тақдирлаш маросимида маълум қилди.

Давлат раҳбари "Буревестник"нинг кучли, ўта кичик ядровий реакторларига эътибор қаратди. Ишга тушириш бир неча сония давом этади, анъанавий реакторлар эса бир неча соат ёки ҳатто кунларни талаб қилади.

"Бундай электр станциялари негизида аллақачон янги авлод қуроллари яратилмоқда. Бундан ташқари, ядро қувватига эга қанотли ракеталарнинг кейинги авлодини яратиш бошланди. Уларнинг тезлиги товуш тезлигидан уч баравар кўпроқ бўлади, келажакда эса гипертовушли бўлади", - деди Россия раҳбари.

Путин, шунингдек, ядро двигателлари, жумладан, экстремал шароитларда фойдали қазилмаларни қазиб олиш учун ишлатилиши мумкин бўлган, электрон компонентлари эса суперкомпютерлар яратишда қўлланилиши мумкин бўлган "Буревестник" ва "Посейдон" ракеталарининг афзалликларини ҳам қайд этди.

"Яратилган ядровий иншоотларнинг кичик ўлчамлари, оғирлиги ва ҳажми, шунингдек, уларнинг хавфсизлиги ва ишончлилиги улардан бориш қийин бўлган ҳудудларда, шу жумладан Арктика шелфида фойдали қазилмалар қазиб олиш учун энергия манбаларини яратишда мослашувчан фойдаланиш имконини беради. "Буревестник" ва "Посейдон"нинг компонентлари ва электроникасига келсак, улар кучли компютерларни яратишда, рақамли бошқарув тизимларини ва алоқа тизимларини ривожлантиришда қўлланилади" - деди Путин.