Нью-Йоркнинг янги мусулмон мэри — Мамдани, аслида, ким?

Зоҳрон Мамдани Нью-Йоркнинг янги ва биринчи мусулмон мэрига айланди.

Мамдани Угандада (Ҳиндистондан чиққан оилада) туғилган, унинг оиласи АҚШга Жанубий Африка орқали кўчиб ўтган, Зоҳрон эса фақат 2018 йилда Америка фуқаролигини олган. Шу билан бирга, ёш йигитнинг (ҳозирда Зоҳрон 34 ёшда) карьераси жуда тез суръатларда ўсди: 2020 йилда у Нью-Йорк штати Ассамблеяси аъзоси этиб сайланди, 2024 йил кузида эса у Нью-Йорк шаҳар мэри лавозимига номзодини қўйиш нияти борлигини эълон қилди. Ўшанда кўпчилик унинг имкониятларини нол деб баҳолаган эди, аммо натижа бошқача бўлди.

Зоҳрон Мамдани Фаластинни қўллаб-қувватлаши ва сиёсий рақибларига нисбатан кескин баёнотлари учун танқид қилинади. Сиёсатчи, жумладан, бойлар учун солиқларни ошириш ва 2030 йилга қадар минимал иш ҳақини кўтариш тарафдори. Угандада туғилган номзод ўз сайловолди кампаниясини, жумладан, аҳоли учун арзон уй-жой масаласи атрофида қурди.

Нью-Йоркда туғилиб ўсган Трамп эса Зоҳронга нисбатан ўз антипатиясини яширмайди. АҚШ президентининг таъкидлашича, агар Мамдани ғалаба қозонса, Оқ уй Нью-Йоркка мамлакат қонунларида белгиланган минимал миқдордан ортиқ федерал маблағ ажратмайди.

Айтиш жоизки, Нью-Йорк бюджети 116 миллиард доллардан ортиқ.