Террорчилар томонидан гаровга олинган Дубай амирининг қариндоши озод қилинди

Бунинг учун 50 миллион евро талаб қилинди, деб хабар бермоқда Sahara Media.

22 сентябр куни Мали давлатида ўғирлаб кетилган истеъфодаги генерал, БАА таркибидаги Дубай амирлигининг ҳукмрон оиласи вакили Аҳмад бин Мактум бин Жума Ол Мактум, шунингдек, яна икки нафар эронлик шахс музокаралардан сўнг aзавад халқи вакиллари воситачилигида озод қилинди. Гаровга олинганларни озод этиш учун Бирлашган Араб Амирликлари томонидан 50 миллион евро тўлангани хабар қилинмоқда.

Оммавий ахборот воситалари маълумотларига кўра, истеъфодаги генерал Малидаги фермага эгалик қилган ва ўғирлангунга қадар шу ерда яшаган. Генерал ва яна икки шахс 22 сентябр куни мамлакат пойтахти Бамако шаҳридан 30 км жанубда жойлашган Сананкоробо шаҳри яқинида “Ал-Қоида”га алоқадор “Жамоат нусратул-ислом вал-муслимин” томонидан ўғирлаб кетилган.

Уларни озод қилиш бўйича музокаралар минтақа етакчиси Арабий Валид Жедин ва Азавад халқининг нуфузли вакиллари - Муҳаммад ал-Маҳрий ва Саид Аҳмад аз-Зумайлий воситачилигида олиб борилди.

Сўнгги бир йил ичида Малида қуролли гуруҳлар томонидан одам ўғирлаш ҳолатлари кескин кўпайди, бу эса Саҳел минтақасидаги жиноий тўдаларнинг асосий даромад манбаларидан бирига айлантирди. Катта миқдордаги товонларнинг тўланиши Мали, Буркина-Фасо ва Нигерда бундай амалиётнинг янада фаоллашишига ёрдам бериши мумкин.