Путин янги доктринани тасдиқлаган

Украина Россиянинг янги ҳаво ҳужумлари стратегиясига жавобан унинг нефтни қайта ишлаш объектларига зарбаларни кучайтиради.

Бу ҳақда Украина президенти Зеленский Reuters агентлигига берган интервьюсида маълум қилди.

Зеленский Россиянинг қиш мавсуми олдидан Украинадаги фуқаролик объектларига ҳужумларни кучайтириш режаларидан далолат берувчи ҳужжатларни қўлга киритганини айтди.

"Россия президенти Владимир Путин фуқаролик объектларининг анча кенг доирасига зарба бериш бўйича янги доктринани тасдиқлаган", — деди Украина етакчиси.

Украина расмийлари қўлга киритган ҳужжатлар Россия инфратузилма, логистика объектлари, йўллар, мактаблар ва шифохоналарга ҳужумлар режалаштирганини кўрсатмоқда. Зеленскийнинг фикрича, Путин бу орқали қўшинлари муваффақиятсизликка учраган ва Россиянинг йўқотишлари ортиб бораётган бир пайтда кучини намойиш этишга интилмоқда.

"Биз ҳар қандай воситалар билан жавоб қайтаришимиз керак. Улар энергетика объектларимизга ҳужум қилса, биз ҳам уларнинг энергетика объектларига зарба беришимиз керак. Аввало, урушни молиялаштирадиган нефтьни қайта ишлаш заводларига зарба берамиз. Лекин биз, албатта, уларга ўхшаб фуқаролик объектларига зарба бермаймиз", — деди Украина президенти.

Россиядан тинчлик музокаралари ёки энергетика инфратузилмаси объектларига зарба беришни тўхтатишдан манфаатдор эканини кўрсатувчи ҳеч қандай сигнал олмаганини айтди. Аввалроқ АҚШ президенти Доналд Трамп бир неча марта Зеленскийдан Россиянинг нефть объектларига зарба бермасликни сўраган эди. Ўшанда Зеленский ҳар икки томон ҳам бу талабга амал қилса, бунга рози бўлишини билдирган.