«Путин сизларни урушга тортади»: Украинанинг собиқ ташқи ишлар вазири огоҳлантирди

Украинанинг собиқ ташқи ишлар вазири Дмитрий Кулеба мамлакат учун келаётган қиш кенг кўламли уруш бошланганидан бери энг оғир давр бўлиши мумкинлигини айтди. У BILD нашри журналисти Пауль Ронцхаймерга берган интервьюсида Россия фронтда ҳал қилувчи натижага эриша олмагани сабабли ҳаво ҳужумларини кучайтирганини таъкидлади.

«Улар нафақат Украинада электр чироқлари ўчишини истамоқда. Улар бутун мамлакатни фалаж қилмоқчи. Менимча, биз бу қишдан омон чиқамиз. Аммо бунинг нархи ўтган йилгига қараганда анча юқори бўлади», — деди Кулеба.

Унинг сўзларига кўра, Россия ҳужумлари нафақат энергетика объектларига, балки озиқ-овқат ва дори-дармон сақланадиган омборларга ҳам қаратилмоқда.

Кулеба ҳозир Владимир Путин билан тинчлик келишувига эришишга умид боғлаш керак эмас, деб ҳисоблайди.

«Буни тан олиш мен учун қанчалик оғир бўлмасин, барчамиз воқеликка холис назар ташлашимиз ва Путин урушни ҳал қилишни ҳам, унда танаффус қилишни ҳам истамаётганини қабул қилишимиз керак. У бундай истакни қачон пайдо қилиши ҳам номаълум — менимча, бундай пайт умуман келмайди», — деди Украинанинг собиқ ташқи ишлар вазири.

Унинг фикрича, Россияда Европага қарши риториканинг кучайиши жамиятни Европа билан янада кенг кўламли можарога тайёрлашга қаратилган бўлиши мумкин.

«Албатта, сиз мени руҳий жароҳат олган ва бирёқлама фикрлайдиган украиналик деб ҳисоблашингиз мумкин. Гўёки мен немисларни Россия билан урушимизга тортишни истармишман. Аммо йўқ, бизнинг сизларни бу урушга тортишимизга умуман ҳожат йўқ. Путиннинг ўзи сизларни урушга тортади», — дея хулоса қилди Кулеба.

Кулебанинг огоҳлантириши Россиянинг Украина энергетикаси ва транспорт инфратузилмасига янги ҳужумлари фонида янгради. Октябрь ойи бошидаги зарбалар электр энергияси ва сув таъминотида кенг кўламли узилишларга, жумладан, Киевда ҳам таъминот муаммолари юзага келишига сабаб бўлган эди.