Зеленскийни лавозимидан кетказиш ҳақидаги чақирув Маскка ҳам ёқиб тушди

Илон Маск Трампнинг Зеленскийни лавозимидан кетказиш ҳақидаги чақирувини қўллаб-қувватлади.

Илон Маск АҚШ президенти Дональд Трампнинг Владимир Зеленскийни танқид қилиши ва Украина раҳбариятини алмаштириш ҳақидаги чақирувини қўллаб-қувватлади.

Трамп Украина томонидан Россиянинг нефтьни қайта ишлаш заводларига берилаётган зарбалар ёқилғи нархининг ошишига сабаб бўлаётганини айтган эди. Маск ушбу баёнотга муносабат билдириб, X ижтимоий тармоғида: «Зеленский ҳаддидан ошиб кетди», деб ёзди. Бошқа бир изоҳида эса: «Қўшиламан, Украинага янги раҳбар керак», дея таъкидлади.

Баҳс Трамп Владимир Путин билан Россия дизел ёқилғисининг жаҳон бозорига етказиб берилишини кўпайтириш бўйича келишувга эришилганини маълум қилганидан кейин авж олди.

Зеленский ушбу қарорни «адолатсиз ва инсофсиз» деб атади. Унинг таъкидлашича, нефть маҳсулотлари экспортидан олинадиган қўшимча даромад Россияга урушни молиялаштириш имконини беради.

Трамп эса бунга жавобан Украинага Россия билан келишувга эриша оладиган янги президент кераклигини билдирди.

Шу билан бирга, Киев Москва Украина энергетика инфратузилмасига ҳужумларни тўхтатган тақдирда, Россия нефтьни қайта ишлаш заводларига зарба беришни тўхтатишга тайёрлигини маълум қилди. Зеленский бундай қадамлар ўзаро келишув асосида амалга оширилиши кераклигини таъкидлади.