Путин Россияни Қийноқларга қарши Европа конвенциясидан чиқаришни талаб қилди

Владимир Путин Россияни Қийноқларнинг олдини олиш бўйича Европа конвенциясидан чиқариш ҳақидаги қонун лойиҳасини Давлат Думасига тақдим этди, деб хабар бермоқда ТАСС агентлиги. Россия ушбу ҳужжатни 1998 йилда имзолаган эди. Конвенция давлатларни маҳкумларга нисбатан шафқатсиз муносабатни олдини олишга мажбур этади ва халқаро тюрма инспекцияларига рухсат беради.

Москва бу қарорни шундай изоҳламоқдаки, энди Россия Қийноқларнинг олдини олиш бўйича Европа қўмитаси фаолиятида қатнашолмайди. Ушбу қўмита вакилларининг Россияга охирги ташрифи 2021 йилда бўлиб ўтган, кейинчалик уларга кириш тақиқланган. 2024 йил ноябрида қўмита Россияни ҳамкорликдан бош тортганликда айблади.

Ҳуқуқ ҳимоячилари узоқ йиллардан бери Россия қамоқхоналари ва колонияларидаги қийноқлар ҳақида хабар бериб келмоқда. Шундай далилларни асирликдан озод этилган украин ҳарбийлари ҳам тақдим этган. БМТ вакилларининг айтишича, Россияда ва Украинадаги босиб олинган ҳудудлардаги қамоқхоналар “қора туйнуклар”га айланмоқда.

Россиянинг ушбу конвенциядан чиқиши Кремлнинг сўнгги йиллардаги сиёсий йўналишининг давоми ҳисобланади: 2022 йилдаёқ Россия Инсон ҳуқуқлари бўйича Европа конвенциясидан ҳам чиққан ва ўз фуқароларини Европа судига мурожаат қилиш ҳуқуқидан маҳрум этган эди.