Путин нима учун Россия армиясини Хитойдан кейинги энг йирик иккинчи армияга айлантиришга буюргани очиқланди

Россия армиясини кенгайтириш таҳдидларни бартараф этиш учун зарур эди, дейди Кремль.

Кремлнинг айтишича, президент Владимир Путиннинг Россия армиясини дунёдаги иккинчи йирик армияга айлантириш режаси Россиянинг ғарбий чегараларида ортиб бораётган таҳдидлар ҳамда шарқдаги беқарорликни бартараф этиш учун зарур.

Путин душанба куни Россия армиясининг мунтазам сонини 180 минг аскарга ошириб, 1,5 миллион фаол ҳарбий хизматчига етказишни буюрди.

Бундай ҳаракат уни Хитойдан кейин дунёдаги иккинчи энг катта армияга айлантиради.

«Бу бизнинг чегараларимиз бўйлаб мамлакатимиз учун мавжуд бўлган таҳдидлар сони билан боғлиқ», деди Кремль матбуот котиби Дмитрий Песков журналистларга конференция чоғида.

"Бунга ғарбий чегараларимиздаги ўта душманона муҳит ва шарқий чегараларимиздаги беқарорлик сабаб бўлмоқда. Бу тегишли чоралар кўришни талаб қилади”, деди у.