Путин «Генерал Армагеддон»ни қайтариши мумкин: британликлар Киевга таҳдид ҳақида огоҳлантирди

Россия президенти Владимир Путин Украина инфратузилмасига зарбаларни кучайтириш учун «Генерал Армагеддон» лақаби билан танилган генерал Сергей Суровикинни яна муҳим лавозимга тайинлаши мумкин. Бу ҳақда Буюк Британиянинг The Telegraph газетаси хабар берди.

Нашр маълумотларига кўра, Суровикин Украина инфратузилмасига, жумладан, Днепр дарёси устидан ўтган кўприкларга зарба бериш кампаниясига раҳбарлик қилиши эҳтимоли бор.

Суровикин Суриядаги ҳарбий амалиётлар давомида қўллаган шафқатсиз усуллари билан танилган. У қўмондонлик қилган Россия қўшинлари Ҳалаб шаҳрини қамал қилиш ва бомбардимон қилишда иштирок этган. Инсон ҳуқуқлари ташкилотлари Россия ва Сурия кучларини шифохоналар, мактаблар ҳамда турар жойларга зарба беришда айблаган.

2022 йилда Суровикин Украинадаги Россия қўшинларига қўмондонлик қилган. 2023 йил июнида Евгений Пригожиннинг исёнидан кейин у жамоатчилик кўзидан ғойиб бўлган. ОАВ хабарларига кўра, кейинчалик генерал Россиянинг Африкадаги ҳарбий фаолияти билан шуғулланган.

The Telegraph ёзишича, Суровикин Москвага қайтган ва Россиянинг Украинага қарши урушида яна муҳим рол ўйнаши мумкин.

Британия нашри, шунингдек, Киевдаги Днепр дарёси устидан ўтган саккизта кўприк эҳтимолий нишонлар қаторида бўлиши мумкинлигини таъкидлаган. Ушбу кўприкларнинг вайрон қилиниши пойтахтнинг икки қисми ўртасидаги транспорт қатновини издан чиқариши ва шаҳар таъминотини қийинлаштириши мумкин.

Тахмин қилинаётган бу ўзгариш Россия армиясининг Украина шарқидаги секин силжиши ва катта йўқотишлар фонида юз бермоқда. Британ журналистлари фикрича, Кремль жанг майдонида ҳал қилувчи натижага эришиш қийинлашаётган бир пайтда, инфратузилмага зарбалар орқали Украина аҳолисига босимни кучайтиришга уриниши мумкин.