Польшада мактабда қотилликка тайёргарлик кўраётган ўсмир қўлга олинди

Польшада мактабда бир неча кишини ўлдиришга тайёргарлик кўрган 14 ёшли ўсмир қўлга олинди, деб ёзади Wprost.

Нашрнинг аниқлик киритишича, ҳуқуқ-тартибот идораларига йигитнинг ниятлари ҳақида унинг дугонаси ва онаси хабар берган. Қизнинг сўзларига кўра, қўлга олинган шахс қурол сотиб олиш ҳақида гапирган ва унга ижтимоий тармоқларда мактаблардаги отишма ҳақида видео юборган.

Аниқлик киритилишича, қўлга олиш чоғида ўсмирдан "100 фоиз йўқ қилиниши керак бўлган шахслар рўйхати" деб номланган ён дафтарчаси олиб қўйилган. Блокнотда олтита ўқувчи ва тўртта ўқитувчининг исмлари ёзилган эди.

Ҳолат юзасидан жиноят иши қўзғатилиб, ўсмир руҳий касалликлар шифохонасига текширувга юборилган.