Беларус президенти Александр Лукашенко Қирғизистон пойтахти Бишкекка ташрифи чоғида сиртдан судланган Қирғизистоннинг собиқ президенти Қурманбек Бакиевни ватанига қайтармаслигини айтиб ҳазиллашди. Бу ҳақда БелТА хабар берди.
«Бакиев ҳам яхши яшаяпти <...> Баъзан меҳмонга чақирса, уйига бориб тураман. Ҳеч қаерга бормайсан, тамом, Беларусда яшайсан, деб айтганман. Шунинг учун биз уни сизга бермаймиз», деди Лукашенко Қирғизистон ОАВ саволларига жавоб берар экан.
Беларус раҳбарининг сўзларига кўра, Бакиев Қирғизистонни «жуда соғинган ва изтиробда», шунингдек, отасининг қабрини зиёрат қилмоқчи. Беларус раҳбари «қирғизлар ўз президентига бундай қилишга йўл қўя олмаслигини» «бошбошдоқлик» деб атади.
«Ўйлайманки, биз бу масалани [Қирғизистоннинг] ҳозирги раҳбарияти билан ҳал қиламиз», деб хулоса қилди Лукашенко.
Қурманбек Бакиев 2005-2010 йилларда Қирғизистон президенти бўлган. У Асқар Акаев ҳукуматига қарши «лола инқилоби» тўлқинида ҳокимият тепасига келган эди. Аммо 2010 йилги «апрел инқилоби» пайтида ҳокимиятдан ағдарилди ва Беларусга қочиб кетди.
Бакиев 2014 йилда сиртдан судланди ва 2010 йил апрел ойида Бишкекдаги намойишчиларни ўққа тутгани учун умрбод қамоқ жазосига ҳукм қилинди. Икки йил ўтгач, суд ҳукмни умрбод қамоқдан 30 йилгача туширди. 2023 йил ёзида Қирғизистон Олий суди Бакиевни «Қумтор» олтин конидаги коррупция иши бўйича яна бир қамоқ жазосига ҳукм қилди.
Каспий денгизи иккига ажралиши мумкин
Тошкент вилояти ва Тошкент шаҳрида "ерфурушлар" қўлга тушди
АҚШнинг Тошкентдаги элчихонаси эълони
