Пентагон ICE ҳаракатларига қарши намойишлар фонида ҳарбийларни Миннесотага юбориш учун тайёрламоқда — The Washington Post

Пентагон ICE ҳаракатларига қарши намойишлар фонида ҳарбийларни Миннесотага юбориш учун тайёрламоқда. Бу ҳақда The Washington Post хабар берди.

Нашрнинг АҚШ Мудофаа вазирлиги вакилларига таяниб хабар беришича, АҚШ мунтазам армиясининг қарийб 1500 нафар ҳарбийсига Миннесота штатига боришга тайёргарлик кўриш буйруғи берилган.

Штатда ҳар куни намойишлар ўтказилмоқда. Бунга Миннеаполис шаҳрида ўтказилган рейд вақтида ICE агенти АҚШ фуқароси Рене Никол Гудни отиб ўлдиргани сабаб бўлган. Миннеаполис мэри Жейкоб Фрей ICE агентларидан “шаҳардан чиқиб кетишни” талаб қилиб, уларнинг ҳаракатлари аҳоли хавфсизлигига таҳдид солаётганини билдирган.

Айни пайтда АҚШ Адлия вазирлиги Миннесота штати губернатори Тим Уолц ва Миннеаполис мэри Жейкоб Фрейга нисбатан иммиграция полицияси фаолиятига тўсқинлик қилиш мақсадида тил бириктирганлик гумони билан тергов бошлаган.

Миннесота губернатори Х ижтимоий тармоғида сиёсий рақибларга қарши суд тизимидан фойдаланиш авторитар амалиёт эканини ёзди. Унинг сўзларига кўра, Рене Гуднинг ўлими билан боғлиқ ишда ҳозирча ягона тергов қилинмаётган шахс — унга қарши қурол қўллаган федерал агент бўлиб қолмоқда.