Педри «Барселона»да Мессининг рекордини ортда қолдирди

"Барселона" ярим ҳимоячиси Педри каталонияликлар сафида 150 та расмий учрашув ўтказди.

"Opta"нинг ёзишича, испаниялик хавбекнинг юбилей ўйини Ла Лиганинг 16-турига тўғри келди: 13 декабрь куни 23 ёшли футболчи "Осасуна"га қарши ўйинда (2:0) асосий таркибда майдонга тушди.

Ушбу баҳс Педри учун муҳим аҳамиятга эга бўлди - у "Барселона" тарихида Ла Лигада 150 та ўйин ўтказган энг ёш футболчига айланди. Бу билан у Лионель Мессининг 2010 йилда эришган натижасини ортда қолдирди.

Аргентиналик футболчи 23 ёшу 121 кунлигида Испания чемпионатидаги 150-учрашувини ўтказди - бу 2010 йил 23 октябрда "Сарагоса"га қарши ўйинда (2:0) содир бўлди. Педри эса бу маррага 23 ёш-у 18 кунлигида етиб келган.

Испаниялик ярим ҳимоячи Ла Лигадаги 150 та ўйинда майдонга тушиш учун 5 йилдан сал кўпроқ вақт сарфлади. У "Барселона" сафида Испания чемпионатидаги дебютини 2020 йилнинг 27 сентябрида "Вильярреал"га қарши ўйинда ўтказган.