«Нефтчи»га чемпион бўлиш учун неча очко керак? Қолган ўйинлар тақвими

Ўзбекистон Суперлигасида чемпионлик учун кураш ҳал қилувчи паллага кирди. Мавсум тугашига уч тур қолганида Фарғонанинг «Нефтчи» клуби бош совринни қўлга киритиш учун энг қулай вазиятда турибди.

14 ноябрь куни 26-турдан қолдирилган учрашувда «Бунёдкор»ни 4:0 ҳисобида мағлуб этган фарғоналиклар очколари сонини 64 тага етказди. Шу тариқа, жамоа иккинчи ўриндаги «Пахтакор»дан беш, учинчи поғонадаги «Навбаҳор»дан тўққиз очкога ўзиб кетди.

Ҳозирда «Нефтчи», «Пахтакор» ва «Навбаҳор» 27 тадан учрашув ўтказган.

«Нефтчи»га чемпион бўлиш учун неча очко керак?

Фарғоналиклар қолган учта учрашувда камида беш очко жамғарса, рақибларининг натижаларидан қатъи назар, Ўзбекистон чемпионига айланади.

Сабаби, 59 очкога эга «Пахтакор» қолган барча баҳсларда ғалаба қозонган тақдирда ҳам, энг кўпи билан 68 очко тўплаши мумкин.

«Нефтчи» эса битта ғалаба ва иккита дуранг қайд этса, 69 очкога етади ва биринчи ўринни кафолатлайди.

Иккита ғалаба ҳам жамоанинг муддатидан аввал чемпион бўлиши учун етарли.

«Нефтчи»нинг қолган учрашувлари:

28-тур. 20 ноябрь, 18:30

«Навбаҳор» – «Нефтчи»

29-тур. 28 ноябрь, 16:15

«Нефтчи» – «Динамо»

30-тур. 2–3 декабрь

«Машъал» – «Нефтчи»

Сўнгги турнинг аниқ санаси ва бошланиш вақти қўшимча тасдиқланиши керак.

Эътиборлиси, 20 ноябрь куни Наманганда бўлиб ўтадиган водий дербиси чемпионлик пойгасида муҳим аҳамият касб этади.

Агар «Нефтчи» «Навбаҳор» ва «Динамо»ни мағлуб этса, очколари сонини 70 тага етказади ва «Машъал»га қарши сўнгги турни кутмасдан чемпионликни расмийлаштиради.

Шу билан бирга, «Пахтакор» навбатдаги учрашувларда очко йўқотса, фарғоналиклар чемпионликни янада эртароқ қўлга киритиши мумкин.

Эслатиб ўтамиз, «Нефтчи» 2025 йилги мавсумда 24 йиллик танаффусдан сўнг Ўзбекистон чемпиони бўлган эди.

Эндиликда фарғоналиклар ўз унвонини ҳимоя қилишга яқин турибди. Агар жамоа қолган учта учрашувда камида беш очко жамғарса, рақибларининг натижаларидан қатъи назар, кетма-кет иккинчи марта мамлакат чемпионига айланади.

Бу «Нефтчи» тарихидаги еттинчи чемпионлик бўлади.