"Пайпоқлар уюми атрофида йиртилган кийимлар, синган стол оёқлари, йиртилган Қуръон нусхалари, «Мен сени севаман» деб ёзилган қизил айиқча ва Аристотел ҳақидаги китоб ётибди"

Ҳужумдан сўнг Ливан шимолидаги қишлоқ аҳолиси Исроил кўчирилган одамларни нишонга олганидан хавотирда.

Пайпоқлар уюми атрофида йиртилган кийимлар, синган стол оёқлари, йиртилган Қуръон нусхалари, «Мен сени севаман» деб ёзилган қизил айиқча ва Аристотел ҳақидаги китоб ётибди. Булар ва бошқа кўплаб нарсалар Шимолий Ливаннинг Аккар вилоятидаги Айн Яқуб қишлоғида Исроилнинг ҳалокатли ҳаво ҳужуми натижасида вайрон бўлган бинолар харобалари орасида сочилиб ётибди.

Қизил Хоч қутқарувчиларининг айтишича, бу вайроналар остида, икки қаватли уй бўлган жойда, ҳали камида битта жасад қолиб кетган. Бир неча метр нарида эса куйиб, таниб бўлмас ҳолатга келган тана қисмлари ерда сочилиб ётибди.

Ливан Қизил Хоч ташкилоти раҳбари Валид Семааннинг айтишича, душанба оқшомида Ливаннинг шимолий чеккасида жойлашган Айн Яқубга Исроил ҳаво ҳужуми уюштирган.

Айн Яқуб аҳолисининг сўзларига кўра, бу нафақат кўп қаватли уйни, балки унинг атрофидаги кўплаб уйларни ҳам йўқ қилган «қирғин»дан бошқа нарса эмас эди.