«Оскар» мукофотига номзод беш йилдан ортиқ муддатга қамоқ жазосига ҳукм қилинди

Теҳрон инқилобий суди машҳур эронлик режиссёр Жаъфар Паноҳийни мол-мулкини мусодара қилиш шарти билан беш йил бир ой муддатга озодликдан маҳрум этишга ҳукм қилди.

Бу ҳақда Emtedad ахборот агентлиги маълум қилинди.

Кинорежиссёрга нисбатан ҳукм унинг иштирокисиз чиқарилган. Бу ҳақда унинг адвокати Мустафо Нили маълум қилган. Унинг сўзларига кўра, Паноҳийга, шунингдек, икки йил давомида ижтимоий тармоқлардан фойдаланиш ва хорижга чиқиш тақиқланган. Режиссёрга қандай айбловлар қўйилгани ҳозирча маълум қилинмаган.

Адвокатнинг айтишича, ўтган ҳафта режиссёрнинг барча банк ҳисоблари огоҳлантиришсиз музлатиб қўйилган. Ушбу қарор сабабларини аниқлаш учун прокурор идорасига борган Нили Паноҳийга нисбатан ҳукм чиқарилганини билган. Суд қарорда кинорежиссёр Эрондан ташқарида яшаётганини қайд этган.

Айни пайтда Паноҳий 2026 йил 30 март куни ватанга қайтган. У бундан бироз олдин «Оскар» мукофотини топшириш маросимида иштирок этиш учун Лос-Анжелесга борган эди. Унинг «Оддий тасодиф» фильми «Энг яхши хорижий фильм» ва «Энг яхши оригинал сценарий» номинацияларида мукофотга даъвогар бўлган.

«Мен ўз мамлакатида бўлиши керак бўлган инсонман. Фақат шу ердагина нафас олишим ва ишлашим мумкин. Агар мени қамоққа ташламоқчи бўлишса, майли, қамашсин. Ватанга қайтиш ҳақидаги қароримни ҳеч нарса ўзгартира олмайди», — деган режиссёр март ойида Variety нашрига берган интервьюсида. Ўшанда уни бир йиллик қамоқ жазоси кутаётган эди.

2022 йилда Паноҳий бир гуруҳ эронлик режиссёрлар билан бирга иштирок этган норозилик намойишлари муносабати билан ҳибсга олинган ва етти ой қамоқда сақланган.

2025 йилда унинг «Оддий тасодиф» фильми Канн кинофестивалининг бош соврини — «Олтин пальма шохи»ни қўлга киритган. 2015 йилда эса режиссёрнинг «Теҳрон таксиси» фильми Берлин кинофестивалида «Олтин айиқ» мукофотига сазовор бўлган.

Режиссёрнинг ушбу ва бошқа айрим фильмлари яширин равишда суратга олинган. 2010 йилда Эрон ҳукумати унга 20 йил давомида кино соҳасида ишлашни тақиқлаган эди. Бу чекловлар фақат 2023 йилда бекор қилинган.