Олимлар ҳомиладорликнинг хавфли асоратига қарши янги даволаш усулини синовдан ўтказмоқда

Олимлар ҳомиладорлик вақтида юзага келадиган оғир асорат — преэклампсияни даволашнинг янги усулини ишлаб чиқмоқда. Бу касаллик юқори қон босими билан кечади ва ҳар йили дунё бўйлаб минглаб оналар ҳамда чақалоқлар ўлимига сабаб бўлади.

Тадқиқот доирасида 16 нафар аёлда янги усул синовдан ўтказилди. Олимлар преэклампсияга сабаб бўлиши мумкин бўлган махсус оқсилни она қонидан чиқариш орқали ҳомиладорликни хавфсиз узайтиришга ҳаракат қилди.

Натижада шифокорлар оғир преэклампсия билан оғриган аёлларда ҳомиладорлик муддатини ўртача 10 кунга узайтиришга эришди. Мутахассислар таъкидлашича, бу она ва чақалоқ саломатлигига салбий таъсир кўрсатмаган.

38 ёшли Мария Патсвальд ҳам ушбу тажрибада иштирок этган. Унга ҳомиладорликнинг 32-ҳафтасида преэклампсия ташхиси қўйилган. Даволаш туфайли у фарзандини 34-ҳафтада дунёга келтиришга муваффақ бўлган.

Олимлар фикрича, агар ушбу усул самарадорлиги тўлиқ тасдиқланса, бу преэклампсияга қарши дунёдаги биринчи сабабий даволаш усулига айланиши мумкин. Тадқиқот натижалари Nature Medicine журналида эълон қилинди.