New York Times Эрон портидаги портлаш сабабини ёзди

Эрон портидаги портлаш кимёвий моддаларнинг нотўғри сақланиши оқибатида юз берган бўлиши мумкин. Бу ҳақда New York Times ёзмоқда.

Нашрнинг Эрон Ислом инқилоби қўриқчилари корпуси билан алоқадор манбаси хабар беришича, Бандар Аббос шаҳри яқинидаги Шаҳид Ражайи портида натрий перхлорат солинган контейнерлар портлаган. Бу модда қаттиқ ракета ёқилғиси ишлаб чиқаришда қўлланилади.

Илгари Эрон давлат ахборот агентлиги портда кимёвий моддалар жойланган контейнерлар портлаганини айтган амалдорнинг сўзларини келтирган, аммо қайси модда ҳақида гап кетаётгани аниқланмаган эди.

Ўз навбатида, Associated Press агентлиги Ambrey хусусий қўриқлаш фирмаси маълумотларига асосланиб, порт март ойида "натрий перхлорат асосидаги ракета ёқилғиси" партиясини қабул қилганини хабар қилди. Бу ёқилғи Хитойдан денгиз йўли орқали Эронга юборилган.

Январь ойида Financial Times газетаси ёқилғи Ғазо секторида ҲАМАС билан уруш пайтида Исроилга тўғридан-тўғри ҳужумлар натижасида тугаб қолган Эроннинг ракета захираларини тўлдириш учун ишлатилиши кераклиги ҳақида хабар берган эди.

Расмий маълумотларга кўра, Эрон портида содир бўлган портлаш оқибатида камида 14 киши ҳалок бўлган, яна 750 киши жароҳатланган.