Нетаньяхунинг маслаҳатчиси ва собиқ матбуот котиби Исроилда ҳибсга олинди

Исроил Бош вазири Беньямин Нетаньяху идораси ва Қатар расмийлари ўртасидаги алоқалар билан боғлиқ бўлган "Qatargeyt" иши бўйича икки гумонланувчи сўроқ қилиш учун ҳибсга олинди.

Бу ҳақда душанба куни полиция матбуот хизмати хабар берди.

Баёнотда ҳибсга олинганлар номи айтилмаган, бироқ Исроилнинг 12-канал телевидениеси полиция Нетаньяхунинг катта маслаҳатчиси Йонатан Урих ва Нетаньяхунинг собиқ матбуот котиби Эли Фельдштейнни ҳибсга олганини айтди. Телеканалнинг таъкидлашича, ҳибсга олинганлар полицияга уларга ким пул бергани ва улар ҳақиқатан Қатар учун ишлаганми ёки йўқлигини айтиши керак.

Тергов ишлари миллий полициянинг "Лаҳав 433" жиноят бўлими ва Бош хавфсизлик хизмати (Шабак) томонидан олиб борилмоқда.

Эслатиб ўтамиз, аввалроқ Шин Бет Исроил бош вазири идораси ходимлари ва Қатар расмийлари ўртасидаги тахминий алоқаларни текширишни бошлаган эди. Times of Israel нашрининг ёзишича, Нетаньяхунинг собиқ матбуот котиби, аввалроқ Исроил Мудофаа кучлари махфий ҳужжатларини ошкор қилганликда айбланган Эли Фельдштейннинг Доҳа томонидан ёлланган халқаро фирма орқали араб давлати учун ишлагани ва Исроиллик журналистларга материаллар етказиб бергани маълум бўлгач, Исроил Бош прокурори Гали Баҳарав-Миара тергов ўтказишни буюрган.

Ўтган йилнинг ноябрида Нетаньяху ёрдамчилари Урих ва Исраэль Эйнхорн 2022 йилги жаҳон чемпионати олдидан Қатарда жамоатчилик билан алоқалар билан шуғулланаётгани хабар қилинган эди.

Исроил ҳукумати Исроил Бош вазири Беньямин Нетаньяху идораси ва Қатар расмийлари ўртасидаги алоқалар бўйича тергов тафсилотларини эълон қилинишига тўсқинлик қилувчи суд қарорини жорий қилди.