Нетаньяху: "Трамп Эронга "жуда кучли" босим ўтказмоқда"

Исроил Бош вазири Беньямин Нетаньяху АҚШ Президенти Дональд Трамп Эронга "жуда кучли" иқтисодий ва ҳарбий босим ўтказаётганини айтди.

Нетаньяху бу ҳақда ижтимоий тармоқдағи видеомурожаатида яқинда Трамп билан телефон орқали суҳбатлашганини таъкидлаб ўтди.

"Мен сизга Яқин Шарқ қиёфасини ўзгартиришга ваъда берган эдим ва биз айнан шундай қиляпмиз. Аввало, Эрон. Мен Президент Трамп билан ажойиб суҳбатлашдим. У Эронга жуда кучли босим ўтказмоқда - ҳам иқтисодий, ҳам ҳарбий. Биз тўлиқ мувофиқлаштирилган ҳолда ҳаракат қиляпмиз", деб таъкидлади Нетаняху.

Унинг қўшимча қилишича, Ливанга ҳам шунга ўхшаш ёндашув қўлланилмоқда. Унинг сўзларига кўра, Исроил Ливан билан "тарихий тинчлик" жараёнини бошлаган, аммо Ҳизбуллоҳ радикал гуруҳи "уни бузишга ҳаракат қилмоқда".

"Биз ҳар қандай таҳдидга қарши тўлиқ ҳаракат эркинлигини сақлаб қоламиз. Биз кеча ҳужум қилдик ва бугун ҳам ҳужум қилмоқдамиз. Биз Шимолий Исроил халқининг хавфсизлигини тиклашга қатъий қарор қилганмиз", деб таъкидлади Нетаньяху.