НАТО маълумотларига кўра, Россия Федерацияси Харкив вилоятида олдинга силжиш пайтида ҳар куни мингга яқин аскарларини йўқотган. Ғарб Украина Қуролли кучлари учун қурол ишлатиш шартларини қайта кўриб чиққандан сўнг, бу ҳудуддаги ҳужум секинлашди.
Харкив вилоятига ҳужум қилишга уриниш пайтида рус армиясининг йўқотишлари кунига ўртача минг кишини ташкил этган. Бу рақамларни 13 июнь, пайшанба куни Брюсселда Шимолий Атлантика альянси мудофаа вазирлари йиғилиши чоғида НАТОнинг юқори мартабали амалдори маълум қилди.
Шу билан бирга, Россия ҳар ойда 30 мингга яқин одамни ёллайди, деди у ва бунинг натижасида рус қўшинлари инсон ресурсларини тўлдиришга муваффақ бўлганини таъкидлади. Расмий Россиянинг Харкив вилоятидаги ҳужумини қайтариш чоғида украиналик ҳарбийлар йўқотишлари ҳақида хабар бермади. Унинг таъкидлашича, Россия қўшинларида катта муваффақиятга эришиш учун етарли ресурслар ва жиҳозлар йўқ, бироқ улар бу соҳаларда Украина Қуролли кучларига нисбатан устунлигини сақлаб қоляпти.
НАТО бош котиби Йенс Столтенберг ҳам Россиянинг йўқотишлари ҳақида шундай баҳо берди.
НАТО Россиянинг Харкив яқинида муваффақият қозонишини кутмаяпти
Айни пайтда, Пентагон раҳбари Ллойд Остин шу куни НАТО қароргоҳида ўтказилган матбуот анжуманида иттифоқчилар Россия қўшинларининг Харкив вилоятида сезиларли муваффақиятга эришишидан энди қўрқмаслигини айтди. Вашингтоннинг таъкидлашича, фронт бу қисмида вазият ўтган ҳафталарга нисбатан барқарорлашган, украиналиклар эса чизиқни ушлаб, ўз позицияларини мустаҳкамлаган бир пайтда Россия олға силжиши секинлашган.
Альянс буни Украина Қуролли кучларига қурол етказиб берувчи қатор давлатлар Украина армиясига улардан Харкив яқинидаги ҳужумни қайтариш учун Россия ҳудудида фойдаланишга рухсат бергани билан изоҳлади.
