НАТО бош котиби Трамп Путин билан учрашишдан бош тортган бир пайтда Вашингтонга келади

НАТО Бош котиби Марк Рютте эълон қилинмаган ташриф билан бугун Вашингтонга келади.

Бу ҳақда Reuters агентлиги юқори мартабали мулозимига таяниб хабар бермоқда.

"Трамп пайшанба куни Оқ уйда НАТО бош котиби билан учрашади", — дейилади хабарда.

Унинг келиши, мухбирнинг сўзларига кўра, Европанинг Дональд Трампнинг сўнгги "дипломатик манёври"га тезда жавоб қайтариш истаги билан боғлиқ, у Ғарб ОАВларининг ёзишича, Будапештда Россия етакчиси Владимир Путин билан учрашишдан бош тортган.

Аввалроқ NBC телеканали Оқ уйдаги манбага таяниб, Путин-Трамп учрашувига тайёргарлик Москванинг Россия-Украина уруши бўйича қатъий позицияси ва ён беришни истамагани туфайли тўхтатилганини маълум қилганди.

Reuters агентлиги дипломатик манбаларга таяниб, Москванинг Украинада зудлик билан ўт очишни тўхтатишга қаршилиги Россия ва АҚШ президентларининг Венгриядаги учрашувини хавф остига қўйганини хабар қилди.

Reuters манбаларига кўра, Россия ташқи ишлар вазири Сергей Лавров ва АҚШ Давлат котиби Марко Рубио ўртасидаги учрашув ҳам қолдирилди, бу эса Вашингтон маъмурияти Москва ён бермаса, саммитни ўтказишни истамаслиги мумкинлигидан далолат беради. "Менимча, Россия жуда кўп нарсани хоҳлади ва Будапештда Трамп билан ҳеч қандай келишув бўлмаслиги АҚШга аён бўлди", — деди манба.

Кейинроқ Оқ уй матбуот котиби журналистларга Трамп яқин келажакда Путин билан учрашишни режалаштирмаётганини айтди.

21 октябрь куни Украина президенти Владимир Зеленский ва Европа етакчилари Трампнинг ҳарбий ҳаракатларни зудлик билан тўхтатиш ҳақидаги таклифини қўллаб-қувватлади. Бироқ Россия ўт очишни тўхтатиш келишувини қабул қилмаслигини таъкидлади ва “можаронинг асосий сабаблари”ни бартараф этишни ўз ичига олган ҳолда кенг қамровли келишув тарафдори. Москва Украинадан НАТОга аъзо бўлиш режаларидан воз кечишни, Россиядан Қрим ва Донбасс устидан назоратни ўтказишни талаб қилмоқда.