Вeнгрия Ташқи ишлар вазирлиги Путин самолётининг ўтишига рухсат бермоқчи бўлмаган давлатлар ҳақида маълумот берди

Европа Иттифоқи (ЕИ) давлатлари Россия президенти Владимир Путин самолётининг ўз ҳаво ҳудуди орқали учишига рухсат бермасалар, бу уларнинг Украинадаги можарони ҳал этиш тарафдори эмаслигини англатади. Бу ҳақда Вeнгрия ташқи ишлар вазири Петер Сиярто Reuters агентлигига берган интервьюсида маълум қилди.

“Агар бирор давлат Россия президентининг самолётига учиб ўтишга рухсат бермаса, бу унинг тинчликни хоҳламаслигини англатади”, — деди дипломат.

Сиярто, шунингдек, Европа давлатлари Путиннинг самолёти Вeнгрияга йўл олган ҳолда уларнинг ҳаво ҳудуди орқали парвоз қилишга рухсат беришларига умид билдирди.

Унинг таъкидлашича, Россия етакчиси Владимир Путин ва АҚШ президенти Дональд Трампнинг эҳтимолий учрашуви “тинчлик учун жуда муҳим аҳамиятга эга”.