Наманганда 1,4 млрд сўмлик қалбаки ва сифати кафолатланмаган дори воситалари аниқланди

Наманган вилоятида 1,4 млрд сўмлик сифати кафолатланмаган ва қалбаки дори воситалари ҳамда тиббий буюмлар сотувга чиқарилишининг олди олинди.

Бош прокуратура ҳузуридаги Департаментнинг Наманган вилояти бошқармаси, ДХХ ва ИИБ ходимлари ҳамкорлигида ўтказилган тезкор тадбирда “M.A.” МЧЖ омбори мудири А.И. Наманган шаҳридаги “Илғор” МФЙ ҳудудида жойлашган нотурар бинода турли номдаги қалбаки ва муддати ўтган дори воситалари ва тиббий буюмларни сотиш мақсадида сақлаб келаётгани аниқланди.

Текширув давомида умумий қиймати 1,4 млрд сўм бўлган 1 337 турдаги дори воситалари ва тиббий буюмлар ашёвий далил сифатида олинди.

Ушбу ҳолат юзасидан Жиноят кодексининг 186-3-моддаси (сифатсиз ёки қалбаки дори воситаларини тайёрлаш, олиш, сақлаш, ташиш ёки ўтказиш) билан жиноят иши қўзғатилиб, тергов ҳаракатлари олиб борилмоқда.