Мьянмадаги зилзила қурбонлари сони 3000 дан ошди

Мьянмада 28 март куни рўй берган кучли зилзила оқибатида 3000 дан ортиқ киши ҳалок бўлди. Бу ҳақда Xinhua агентлиги хабар бермоқда.

Маълумотларга кўра, айни дамда 3003 киши ҳалок бўлган, 4515 нафар ярадор ва 351 киши бедарак йўқолган. Аввалроқ 2,8 минг киши ҳалок бўлгани хабар қилинганди.

Эслатиб ўтамиз, 28 март куни Жануби-Шарқий Осиёда кучли зилзила содир бўлган эди. Турли маълумотларга кўра, унинг магнитудаси 7,7 дан 7,9 гача бўлган. АҚШ Геологик хизмати зилзила маркази Мандалайдан 17,2 км узоқликда, 10 км чуқурликда бўлганини маълум қилди. Шундан сўнг 6,4 магнитудали иккинчи зилзила содир бўлди.

Мьянмада бир ҳафталик миллий мотам эълон қилинди. Мамлакат давлат байроғи 6 апрелга қадар ярим кўтарилади.