Мундиал очилиш ўйинида майдонга тушадиган Жанубий Африка терма жамоаси Мексикага учиб кета олмади

ЖАР терма жамоаси бир қанча ўйинчилар ва ходимларнинг виза муаммолари сабабли жаҳон чемпионатига ўз вақтида жўнаб кета олмади.

Жамоа якшанба куни чартер рейси орқали Мексиканинг Пачука шаҳридаги машғулот базасига учиб кетиши керак эди, аммо рейс қолдирилди. ЖЧ доирасидаги Мексикага қарши дастлабки ўйингача 11 кун қолди.

ЖАР футбол ассоциацияси (SAFA) парвознинг барбод бўлишига айрим ўйинчилар ва расмий шахслардаги «виза билан боғлиқ қийинчиликлар» сабаб бўлганини маълум қилди. Ташкилот жамоа имкон қадар тезроқ Мехикога учиб кетиши учун иш олиб бораётганини билдирди.

«SAFA жамоа Мехикога имкон қадар тезроқ учиб кетиши учун кеча-ю кундуз ишламоқда. Биз жамоанинг турнирга тайёргарлиги режа бўйича кечишини таъминлашга қатъий аҳд қилганмиз. Жўнаб кетгунга қадар терма жамоа Йоханнесбургда машғулотларни давом эттиради», — дейилади ассоциация баёнотида.

ЖАР ЖЧдаги иштирокини 11 июнь куни Мексикага қарши ўйин билан бошлайди. Жамоа жаҳон чемпионатида 2010 йилдан буён, яъни турнирга ўзи мезбонлик қилганидан бери илк бор иштирок этмоқда.

Бу терма жамоа атрофидаги биринчи маъмурий можаро эмас. Саралаш босқичида ЖАР деярли ЖЧ йўлланмасидан маҳрум бўлишига сал қолганди: Лесото устидан қозонилган 2:0 ҳисобидаги ғалаба дисквалификация қилинган Тебохо Мокоэнанинг майдонга тушгани сабабли бекор қилинган эди. Шунга қарамай, жанубий африкаликлар гуруҳда Нигерия ва Бенинни бир очко фарқ билан ортда қолдириб, биринчи ўринни эгаллаганди.

А гуруҳида ЖАР, шунингдек, 18 июнь куни Атлантада Чехия ва 24 июнь куни Монтеррейда Жанубий Корея билан куч синашади.