Москва Tomahawk'лар ҳақида эшитиши биланоқ мулоқотни тиклашга ошиқмоқда — Украина президенти

Зеленский Қўшма Штатларга ташрифи чоғида бир қатор баёнотлар берди. Жума куни у АҚШ президенти Доналд Трамп билан учрашиши режалаштирилган.

"Аллақачон Вашингтондаман. Бугун АҚШ мудофаа компаниялари вакиллари билан учрашувлар бўлади, бу бизнинг мудофаа қудратимизни кучайтириши мумкин бўлган қурол ишлаб чиқарувчилар. Хусусан, биз қўшимча ҳаво ҳужумидан мудофаа тизимлари етказиб бериш масаласини муҳокама қиламиз. Шунингдек, бугун америкалик энергетика компаниялари вакиллари билан ҳам учрашув бўлади. Россия бизнинг энергетика тизимимизга қарши террорни танлаган, ҳар куни энергетика объектларимизга зарба бермоқда, биз эса Украинани барқарор қилиш устида ишлаяпмиз", — деб ёзди Зеленский Х ижтимоий тармоғида.

"17 октябр куни президент Трамп билан учрашув режалаштирилган. Биз Яқин Шарқда террор ва урушни жиловлашга олиб келган ҳаракатлар Россиянинг Украинага қарши урушини ҳам тугатишига ёрдам беради, деб умид қиламиз. Путин ҲАМАС ёки бошқа бирор террорчидан кўра жасур эмас. Куч ва адолат тили Россияга нисбатан ҳам албатта ишлайди. Кўряпмизки, Москва Tomahawk'лар ҳақида эшитиши биланоқ мулоқотни тиклашга шошилмоқда", — дея қўшимча қилди Украина президенти.