“Meta” бутун дунё бўйлаб минглаб ходимларини ишдан бўшатмоқчи

“Meta” компанияси бутун дунё бўйлаб ишчи кучининг тахминан 5%ини қисқартиришни режалаштирмоқда. Бу ҳақда “The Guardian” нашри хабар берди.

Бош директор Марк Сукерберг ходимлар учун ёзган хизмат хатида “кескин йил” арафасида “самарасиз ходимларни тезроқ ишдан бўшатиш” тўғрисида қарор қабул қилгани ва компаниянинг одатий самарадорликни бошқариш тизимини тезлаштиришини айтди.

Сўнгги молиявий ҳисоботга кўра, сентябрь ойи охирида “Мета” бутун дунё бўйлаб 72 минг кишини ишга олган, бу эса режалаштирилган қисқартиришлар 3600 ходимга таъсир кўрсатиши мумкинлигини англатади.

Бу эълон “Meta” компанияси учинчи томон фактчекерларидан воз кечиши ва Доналд Трамп Оқ уйга қайтишга тайёргарлик кўраётгани сабабли сўз эркинлигига устувор аҳамият беришини маълум қилганидан сўнг бир неча кун ўтиб эълон қилинди.

АҚШдаги “Мета” ходимларидан қисқартиришларга дуч келганлари 10 февралгача хабардор қилиниши, бошқа мамлакатлардаги ходимлар эса бу маълумотни кейинроқ олиши кутилмоқда.

“Самарадорликни бошқариш мезонларини юқори даражага кўтаришга қарор қилдим”, дея хабар берган Сукерберг хизмат хатида.

“Одатда, бир йил ичида кутилган натижаларни кўрсата олмаган ходимларни ишдан бўшатамиз, лекин энди биз ушбу давр мобайнида эришилган натижаларга асосланиб, янада кенг кўламли қисқартиришларни амалга оширмоқчимиз”, дея қўшимча қилди у.

Сукербергнинг таъкидлашича, компания аввалги қисқартиришлардаги каби ишини йўқотадиган ходимларга “сахий ишдан бўшатиш нафақасини тақдим этади”.