Мексика АҚШда мухожирларга қарши уюштирилган рейдлардан хавотирда

Мексика Калифорниянинг Лос-Анжелес шаҳрида жума куни бошланган ноқонуний муҳожирларнинг оммавий ҳибсга олинишидан чуқур хавотир билдирди.

Бу ҳақда Мексика ташқи ишлар вазирлиги баёнотида айтилган.

"Мексика Ташқи ишлар вазирлиги Иммиграция ва божхона назорати (ICE) томонидан АҚШнинг турли шаҳарларида, хусусан Лос-Анжелесда (Калифорния штати) яқинда ўтказилган, муҳожирлар, шу жумладан, Мексика фуқароларининг ҳибсга олинишига олиб келган операциялардан чуқур хавотир билдиради", дейилади департамент сайтида эълон қилинган баёнотда.

Шу муносабат билан Мексика ҳукумати "Ҳурмат билан, лекин қатъий равишда АҚШ расмийларини барча миграция тартиб-қоидалари тегишли юридик амалиётга мувофиқ, инсон қадр-қимматини ҳурмат қилиш ва қонун устуворлиги доирасида амалга оширилишини таъминлашга чақиради".

Мексика дипломатик миссияси Қўшма Штатлардаги ўзининг консуллик тармоғи орқали "ҳибсга олинган мексикаликларга тегишли ҳуқуқий маслаҳат ва адолатли муносабатда бўлишини таъминлаш" учун консуллик ёрдами ва ҳимояси механизмларини фаоллаштирганини таъкидлади.

Америка матбуотига кўра, жума куни Лос-Анжелесда ноқонуний муҳожирларни оммавий ҳибсга олиш бошланди; шанба оқшомига келиб, иммиграция қонунларини бузганликда айбланиб, камида 44 киши ҳибсда эди. Ҳуқуқ-тартибот идораларининг ҳаракатларига жавобан шаҳарда намойишлар бошланди. CBS телеканалининг қайд этишича, намойишчилар ҳуқуқ-тартибот идоралари ходимлари ишига тўсқинлик қилишга уринган, йўлни тўсиб, ICE ходимларига тош ва петардалар отган.

Оқ уй президент Дональд Трампнинг буйруғи билан тартибсизликларга қарши кураш учун Лос-Анжелесга Миллий гвардиянинг 2000 аскари юборилишини маълум қилди.