Медведев: Литва дунё харитасидан йўқолиб кетади, агарда...

Медведев Литвани ядро қуроли масаласида огоҳлантирди.

Россия Хавфсизлик кенгаши раиси ўринбосари Дмитрий Медведев Литва АҚШ ядро қуролини ўз ҳудудига жойлаштирса, «дунё харитасидан йўқолиши» мумкинлигини айтди.

Унинг таъкидлашича, агар Россия Литвага ҳужум қилса, НАТО давлатлари альянснинг жамоавий мудофаани назарда тутувчи 5-моддасини амалга оширишга тайёр бўлмаслиги мумкин. Медведев бундай ҳолатда Литвани ҳимоя қилиш учун бошқа давлатлар урушга киришмаслигини билдирди.

Литва Мудофаа вазирлиги июнь ойида АҚШ билан мамлакат ҳудудига ядро қуролини жойлаштириш эҳтимоли бўйича музокаралар олиб борилаётганини маълум қилган эди. ОАВ хабарларига кўра, гап ядро қуролини олиб юриш имкониятига эга бўлган АҚШ бомбардимончи самолётлари ҳақида кетмоқда.

Литва Конституциясида мамлакат ҳудудига оммавий қиргин қуроллари ва хорижий ҳарбий базаларни жойлаштириш тақиқланган. Бироқ Литва парламенти ушбу тақиқни бекор қилиш масаласини кўриб чиқмоқда.

Россия президенти матбуот котиби Дмитрий Песков бу ҳаракатни «эскалация ва кескинлик нуқтаи назаридан жуда жиддий бурилиш» деб атади. Унинг айтишича, агар Литва ҳудудида Россияга қарши йўналтирилган ядро қуроли жойлаштирилса, Литва ҳам Россия ядро қуролларининг нишонлари қаторига кириши мумкин.

Шу билан бирга, Россия президенти Владимир Путин Россия Европа давлатларига таҳдид қилмаётгани ва бундай ниятга эга эмаслигини билдирди.

«Биз Европа давлатларига таҳдид қилмаяпмиз ва таҳдид қилиш ниятимиз ҳам йўқ», — деди Путин.

Унинг таъкидлашича, Россиянинг Европа билан можаро қилиш учун асоси йўқ. Путин, шунингдек, Украинага Европа давлатларининг ҳарбий контингенти жойлаштирилиши Россия томонидан «Россия билан уруш» сифатида баҳоланишини айтди.

Айни пайтда, Россия ҳарбийлари Одесса ва унинг яқинидаги Черноморск шаҳрига ракетали ҳужум уюштирган. Маълумотларга кўра, икки шаҳарда жами 40 киши жабрланган, Одессадаги 25 қаватли турар жой биноси жиддий зарар кўрган.