Россия билан иттифоқ тузилишидан олдин Шимолий Корея инфратузилмаси самарасиз бошқарув ва халқаро санкциялар туфайли эътиборсиз ҳолга келиб қолган эди. Вашингтондаги Стимсон марказининг Корея дастури катта илмий ходими Мартин Уильямс DWга берган интервьюсида айтишича, Россия ва Хитой билан савдо қайта тикланганидан сўнг бу вазият «ўлик нуқтадан силжиди».
«Мамлакат бўйлаб заводлар ва шифохоналар қуриш бўйича бир нечта йирик дастур амалга оширилмоқда. Ким Чен Ин Пхеньянда бутунлай янги ҳудудларни ривожлантириш бўйича топшириқ берди. Бундан ташқари, қишлоқ жойларда уй-жой қуриш лойиҳаси ҳам амалга оширилмоқда. Унга кўра, ўн минглаб уйлар барпо этилиши режалаштирилган», — деди Уильямс.
Жанубий Корея разведка маълумотларига кўра, Пхеньян сўнгги уч йил ичида Москвадан 14 миллиард долларгача маблағ олган. Бу маблағлар, жумладан, қурол-яроғ етказиб бериш ва КХДР ҳарбийларининг Курск вилоятидаги жангларда иштирок этиши эвазига берилган.
Бу сумма Шимолий Корея ялпи ички маҳсулотининг ярмидан кўпини ташкил этади. 2024 йилда КХДРнинг ЯИМ ҳажми 26,6 миллиард доллар бўлган.
Айни пайтда кутилмаганда келиб тушган даромадларнинг тобора катта қисми КХДРнинг ҳарбий салоҳиятини кучайтиришга йўналтирилмоқда.
9 сентябрь куни Халқаро атом энергияси агентлиги (МАГАТЭ) Ёнбёнда янги ядровий объект аниқланганини маълум қилди.
МАГАТЭ баҳоларига кўра, ушбу объект Пхеньянга ҳар йили 85 килограмм қурол-яроғ тайёрлаш учун мўлжалланган юқори даражада бойитилган уран ишлаб чиқариш имконини беради. Бу эса тўртта ядровий каллак тайёрлаш учун етарли миқдор ҳисобланади.
Японияда уйқу мусобақаси бўлиб ўтади, унда ғолиб катта пул мукофотига сазовор бўлади
Сунъий интеллект қачон "қайтиб бўлмайдиган нуқтага" етиши мумкинлиги маълум бўлди
iPhone 18 Pro тўрт хил рангда тақдим этилди
