Мамлакатдан қочиб кетган Мадагаскар президентининг ўрнини ким эгаллайди?

Мадагаскар Олий суди армия полковниги Майкл Рандрианиринани ҳокимиятни эгаллаб олиш ортидан президентлик лавозимини эгаллашга чақирди.

Бу ҳақда Reuters агентлиги хабар бермоқда.

"Мадагаскар Олий суди сешанба куни "Z авлоди" намойишчиларни қўллаб-қувватлаш мақсадида исён уюштирганидан сўнг ҳокимиятни эгаллаб олган армия қўмондони, полковник Майкл Рандрианиринани мамлакатнинг янги президенти лавозимини эгаллашга чақирди", — дейилади хабарда.

Олий суд, шунингдек, Рандрианиринани 60 кун ичида янги сайловлар ташкил этишга чақирди.

Аввалроқ, ҳарбийлар бошлиғи, полковник Майкл Рандрианирина оммавий нутқи чоғида янги сайловлар ўтказилгунга қадар икки йил давом этадиган ўтиш даври бошланганини эълон қилган эди.