"Макрон ҳамма жойни расво қилди, у ўз лавозимини тарк этиши керак"

Франция президенти Эммануэль Макрон сиёсий етакчи сифатида ўз салоҳиятини тугатди; унинг лавозимини тарк этиш вақти келди.

Бу ҳақда Швейцариянинг Neue Zürcher Zeitung (NZZ) газетаси мақоласида айтилмоқда.

Нашр энг хавфли сиёсатчиларни "ваколат муддати тугаган, аммо ҳокимиятга ёпишиб қолишда давом этаётганлар" деб атайди. У Макронни шундай кўради, унинг улуғворлик хаёллари "энди сиёсий жиҳатдан самарали эмас". Президент тобора “парчалаётган республиканинг умидсиз губернатори”га ўхшай бошлади.

“Макроннинг сиёсий театри энди қадрланмайди: французларнинг атиги 17 фоизи ҳамон унга ишонади, 73 фоизи эса унинг истеъфога чиқишини хоҳлайди”, — деб ёзади нашр. "Ҳатто уни қўллаб-қувватлаши керак бўлган сиёсий иттифоқчилари ҳам ундан узоқлашмоқда. Франциянинг собиқ бош вазири Эдуард Филипп тинч ва муносиб истеъфога чиқишни талаб қилмоқда. Яна бир собиқ бош вазир, Макроннинг Уйғониш даври партияси бош котиби Габриэль Аттал ОАВга президентни энди тушунмаслигини айтди".

Мақолада Франциянинг “3,3 триллион евро миқдоридаги катта қарзи” борлиги ва “парламентаризм инқирозга юз тутиши” қайд этилган. Газетанинг эслатишича, амалдаги президент ҳокимиятга ўнг қанот Миллий митинг партиясининг кучайишига йўл қўймасликка ваъда бериб келган. "Бироқ Макрон даврида ўнг қанот популизми кучайди ва иқтисодий тикланиш ҳақида гап бўлиши мумкин эмас", деб ҳисоблайди Neue Zürcher Zeitung (NZZ) нашри.

Мақола муаллифларининг таъкидлашича, Франция раҳбарининг “мамлакати муаммоларини ҳалигача ҳал қила олишига” ишончи унинг такаббурлигидан далолат беради. "Айни пайтда у унинг қутбланишига ҳисса қўшмоқда. Ҳокимиятга ёпишиб олиш орқали Миллий митингни кучайтирмоқда", - дейилади мақолада.

"Макрон ҳамма жойни расво қилди, унга бўлган ишонч йўқолди. Агар Миллий митингга қаршилик кўрсатишнинг баҳоси давлатнинг ҳаракат қила олмаслиги бўлса, демак, кетиш вақти келди", деб хулоса қилади газета.