Мадуро Венесуэлада фавқулодда иқтисодий вазият жорий қилди

Венесуэла президенти Николас Мадуро фавқулодда иқтисодий вазият тўғрисидаги конституциявий фармонни имзолади.

Бу ҳақда Venezolana de Televisión телеканалининг жонли эфирида маълум қилди.

Венесуэла раҳбари ўз қарорини “халқаро вазият ва бутун дунё ва Венесуэлага қарши савдо-иқтисодий уруш оқибатлари” билан асослади.

"Мен иқтисодий фавқулодда ҳолат тўғрисидаги фармонни имзолайман, бу менга икки ой давомида миллий иқтисодиётни ҳимоя қилиш ва олдинга силжиш учун турли сиёсий воситалардан фойдаланишга имкон беради", деди Мадуро.

Президент фармон тасдиқлаш учун республика Миллий мажлисига (парламентига) юборилиши ва Миллий газетада эълон қилинганидан кейин кучга киришини маълум қилди. Фавқулодда иқтисодий вазият Венесуэланинг бутун ҳудудида 60 кунлик муддатга жорий этилган ва уни худди шу муддатга узайтириш ҳуқуқига эга, деди у.

Эслатиб ўтамиз, 2 апрель куни АҚШ президенти Дональд Трамп 185 та давлат ва ҳудуд маҳсулотларига божхона тўловлари жорий этилишини маълум қилган эди. 10 фоизлик универсал тарифлар 5 апрелдан кучга кирди, индивидуал тарифлар 9 апрелдан бошланади.