Лондоннинг Кенсингтон туманида Эрон олий раҳбари Мужтаба Хоманаийга алоқадор деб гумон қилинаётган икки элит квартира сотувга қўйилди. Бу ҳақда The Sunday Times хабар берди.
Мулкларнинг расмий эгаси сифатида Эронлик банкир ва тадбиркор Али Ансарий кўрсатилган. У АҚШ Молия вазирлиги томонидан Мужтаба Хоманаийнинг «асосий молиявий воситачиси» сифатида таърифланган ва 2026 йил июль ойида санкциялар рўйхатига киритилган. Вашингтон Ансарийни Эрон фуқароларининг маблағларини ўзлаштиришда ҳам айблаган.
Квартиралар Лондондаги 3а Palace Green манзилида, Кенсингтон саройи яқинида жойлашган. Улар 2014 ва 2016 йилларда жами қарийб 36 миллион фунт стерлингга сотиб олинган.
Улардан бири беш хонали дуплекс бўлиб, олтинчи ва еттинчи қаватларни эгаллайди. Майдони 3 944 квадрат футни ташкил этади. 2016 йилда 19 миллион фунтга харид қилинган ушбу квартира ҳозир қарийб 12 миллион фунтга сотувга қўйилган.
Иккинчи квартира еттинчи ва саккизинчи қаватларда жойлашган бўлиб, 2014 йилда 16,75 миллион фунтга сотиб олинган. Ҳар икки мулк ҳам қарздорликлар сабабли қабул қилувчилар бошқарувига ўтган.
Маълумотларга кўра, Ансарий ипотека мажбуриятларини бажара олмаганидан сўнг Британия ҳукумати мулкларни сотишга рухсат берган. Сотувдан қарзлар қопланганидан кейин қоладиган маблағлар Ансарий санкциялар остида қолар экан, музлатиб қўйилиши кутилмоқда.
Шу билан бирга, Хоманаийнинг ушбу квартираларнинг бевосита эгаси экани расман тасдиқланмаган. Оммавий ахборот воситаларида улар Ансарий орқали Эрон олий раҳбарига боғлангани ҳақида маълумотлар келтирилмоқда.
Шаҳноза Мирзиёева Мусулмон Юнусовнинг мурожаатига муносабат билдирди
Фарғонада кўп қаватли уй "подвалида" акула боқилаётгани аниқланди
Уруш оқибатлари: Россия ғалласи Қозоғистонникини сиқиб чиқармоқда
