Лондон Россияни қўллаб-қувватлаган компанияларни «қора рўйхат»га киритди. Улар орасида Марказий Осиё корхоналари ҳам бор

Буюк Британия ҳукумати Россияга қарши жорий этилган халқаро санкцияларни четлаб ўтишга кўмаклашган хорижий тузилмаларга нисбатан чекловларни кенгайтирди. Бу галги «қора рўйхат»дан Қирғизистон ва Грузия компаниялари ҳам жой олди.

Британия Ташқи ишлар вазирлигининг расмий баёнотига кўра, Россия ҳарбий ва иқтисодий салоҳиятини қўллаб-қувватлашда айбланаётган 15 та компания ва 3 нафар жисмоний шахсга нисбатан янги санкциялар пакети қабул қилинган.

Қирғизистон молия тизими орқали ўтган миллиардлар

Янги чекловлар асосан криптовалюта айирбошлаш шохобчалари ва «A7» деб номланувчи тармоққа қарши қаратилган. Расмий Лондоннинг билдиришича, мазкур тармоқ маблағларни Россия ҳарбий иқтисодиётига йўналтиришда Қирғизистон молия тизимларидан унумли фойдаланиб келган. Текширувлар натижасида ўтган йилнинг ўзида ушбу тизим орқали қарийб 90 миллиард доллар маблағ айлантирилгани аниқланган.

Шунингдек, рўйхатга киритилган «Евроосиё жамғарма банки»га нисбатан энг қатъий чоралар қўлланган. Ушбу банк Кремл учун стратегик муҳим бўлган соҳаларга хизмат кўрсатганликда айбланмоқда. Санкцияга кўра, банкнинг активлари музлатилади, раҳбарларининг ишлаши тақиқланади. Бундан ташқари, Британия молиявий тузилмаларига ушбу банк билан вакиллик муносабатлари ўрнатиш ва ҳар қандай пул ўтказмаларини амалга ошириш бутунлай маън этилди.

Виртуал активлар ва контентларга тақиқ

Британия расмийлари «Давлат брокерлик компанияси» ва «Эмитент виртуальных активов» ташкилотларини ҳам Россия ҳукумати манфаатларига хизмат қилганликда айбламоқда. Уларнинг активлари музлатилиб, траст хизматлари чекланади.

«„Эмитент виртуальных активов“ компаниясига нисбатан алоҳида махсус чекловлар ҳам жорий этилди. Эндиликда Буюк Британия ҳудудидаги провайдерлар, ижтимоий тармоқлар ва иловалар дўконлари фойдаланувчиларнинг ушбу тузилма сервислари ҳамда контентларига киришини блоклашга мажбур», — дейилади ҳужжатда.

Бундан ташқари, санкциялар пакети доирасида Россияга аввал жорий этилган тақиқларни айланиб ўтишда воситачилик қилган Грузиянинг учта компанияси ҳам чекловлар остига тушган. Нашримиз вазият ривожини кузатишда давом этади.