Ливан расмийлари: Исроил зарбаси натижасида “Ҳизбуллоҳ” аъзоси ва икки суриялик ҳалок бўлди

Ливан жанубида Исроил ҳарбий-ҳаво кучларининг учувчисиз учар қурилмаси пикапга зарба бериши оқибатида камида уч киши ҳалок бўлди.

Бу ҳақда Ливан Соғлиқни сақлаш вазирлиги хабар бермоқда.

Расмий маълумотларга кўра, зарба Мейс-ал-Жебел ва Блида шаҳарлари ўртасидаги шосседа ҳаракатланаётган автомобилга берилган. Ракета зарбаси оқибатида машина ёниб кетган, унда бўлганларнинг барчаси ҳалок бўлган.

Жаноубиа портали маълумотларига кўра, зарба мақсади "Ҳизбуллоҳ" ҳаракати фаоли бўлган, у билан бирга икки нафар Сурия фуқароси ҳалок бўлган.