Лионель Месси Каталония клубини сотиб олди

АҚШнинг “Интер Майами” ва Аргентина терма жамоас сардори Лионель Месси Терсера RFEF (Испаниянинг бешинчи дивизиони) лигасида иштирок этувчи Каталониянинг “Корнеля” клубини сотиб олди.

Саккиз карра “Олтин тўп” соҳиби Байш-Лобрегат минтақаси жамоасини сотиб олиш бўйича келишувни якунлади. Ушбу келишув орқали Месси Барселона шаҳри билан ўзининг яқин алоқаларини янада мустаҳкамлади.

Истеъдодлар фабрикаси

1951 йилда ташкил этилган “Корнеля” Каталония ва Испания футболидаги ўз анъанасига эга клублардан бири саналади. Тарихи давомида жамоа ёш футболчиларни тайёрлашда ўзига хос намуна вазифасини ўтаб келган.

Клуб сафидан миллий ва халқаро миқёсдаги элита даражасига чиққан кўплаб футболчилар етишиб чиққан. Улар орасида “Арсенал” ва Испания терма жамоаси дарвозабони Давид Рая, Мессининг “Барселона” ва “Интер Майами”даги жамоадоши Хорди Альба, “Барселона” асосий таркибидан жой олган Жерар Мартин, “Эспанёл” сардори Хави Пуадо, Сенегал терма жамоаси аъзоси Кейта Балде, “Бетис” сардорларидан бири Аитор Рубиал ва MLS чемпиони Иле Санчес каби номлар бор.

Лео Мессининг келиши клуб тарихида янги саҳифа очади. Лойиҳанинг асосий мақсади – спорт ва институционал ўсишни рағбатлантириш, клуб тузилмасини мустаҳкамлаш ва ёш истеъдодларни қўллаб-қувватлашни давом эттиришдир.

“Стратегик режа узоқ муддатли истиқболга мўлжалланган бўлиб, у ўз ичига улкан мақсадлар ва барқарорликни қамраб олади”, дейилади Marca нашри хабарида.

Ҳозирда жамоа Сегунда RFEF (тўртинчи дивизион) лигасига чиқиш учун курашмоқда. Терсера RFEF 5-гуруҳида “Корнеля” 55 очко билан учинчи ўринни эгаллаб турибди ва “Манреса” (60 очко) ҳамда “Бадалоня”дан (57 очко) ортда қолмоқда.

Аввалроқ Криштиану Роналду ҳам Испаниянинг “Алмерия” футбол клубининг 25 фоиз акциясини сотиб олган эди. Инвестиция Роналду спорт бизнеси операцияларини бошқаришда фойдаланадиган CR7 СА гуруҳи таркибида ташкил этилган CR7 Sports Investments корхонаси орқали амалга оширилган.

“Алмерия” охирги марта 2023/24 йилги мавсумда Ла Лигада иштирок этган. Жамоа ҳозирда Испания иккинчи лигаси — Сегунда чемпионлиги учун курашмоқда.