Левандовски «Олтин тўп» учун курашдаги фаворитларни айтди

«Барселона» ва «Бавария»нинг собиқ ҳужумчиси, айни пайтда АҚШнинг «Чикаго Файр» клубида тўп сураётган Роберт Левандовски «Олтин тўп» учун асосий даъвогарлар ҳақидаги фикрлари билан ўртоқлашди.

Польшалик футболчи фаворитлар қаторида собиқ жамоадоши Ламин Ямални қайд этди. Шунингдек, у «Бавария» сафида ҳаракат қилаётган Ҳарри Кейн ва Майкл Олисенинг ўйинларини алоҳида эътироф этди.

«Албатта, мен Ламиннинг «Олтин тўп»ни қўлга киритишини истайман. У ажойиб футболчи, айниқса, ёшини ҳисобга олсак.

Ҳарри Кейн «Бавария»га фаолиятининг энг гуллаган даврида келди. Унинг қилаётган ишлари ҳайратланарли. Қанча гол ураётганига қаранг! Мен жамоани тарк этганимдан кейин «Бавария»га шундай ҳужумчи етишмаётган эди. Кейн билан жамоа ҳақиқатан ҳам жуда яхши ўйнаяпти.

Олисе ҳақида эса фақат «Вау!» дейишим мумкин. У ўйин тақдирини ўзгартиришга қодир футболчи. Менимча, Кейн, Олисе ва Диаснинг ўзаро ҳамкорлиги, ҳаракатлари — идеал уйғунлик.

Ўтган мавсумдаги ўйинларига қарайдиган бўлсак, «Бавария»га фақат Чемпионлар лигаси соврини етишмади. Агар улар ўтган йили Чемпионлар лигасида ғолиб бўлишганида, бу 2020 йилда биз барча совринларни қўлга киритган мавсумга ўхшаш тарзда баҳоланиши мумкин эди. Чунки улар жуда ажойиб футбол намойиш этишди.

Сўнгги бир-икки йилда Бундеслигада мен ўйнаган даврга нисбатан бироз ўзгаришлар бўлди. Масалан, «Бавария»нинг «Лейпциг»ни 6:1 ҳисобида мағлуб этганини олайлик. Балки бундай натижа чемпионат учун энг яхши ҳолат эмасдир. Аммо «Бавария»нинг ривожланиши ҳайратланарли. Уларнинг тажрибасидан ўрганиш мумкин, бошқа жамоалар ҳам улардан намуна олишга ҳаракат қилишлари мумкин.

Олисени буюк келажак кутмоқда. Биламан, ҳамма Ламин ҳақида гапиради. Аммо мен баъзан бошқа футболчиларга ҳам эътибор беришга, ҳали ҳамма пайқамаган жиҳатларни кўришга ҳаракат қиламан.

Агар Олисе Жаҳон чемпионатида бир-иккита гол урганида, у ҳам Ламин ёки Ҳарри Кейн каби «Олтин тўп»нинг асосий фаворитларидан бирига айланган бўларди.

Унинг қарорлари мукаммал: у вазиятни ҳис қилади, қачон зарба бериш, қачон пас узатиш ва қандай пас бериш кераклигини яхши билади. Ламиннинг ўйинини томоша қилиш менга жуда ёқади. Олисенинг ҳаракатларини кузатиш ҳам бирдек завқли», — дея Левандовскининг сўзларини келтиради The Athletic нашри.