«Kun.uz» ва «Xabar.uz» сайтлари ишламай қолди. «Ўзбектелеком» бунга алоқадорлигини рад этди

Ҳам ўзбекистонлик, ҳам чет эллик фойдаланувчилар сайтларга кира олмаяпти. Икки сайт ҳам битта хостинг майдончада жойлашган.

Сайтлар таҳририятлари Telegram-каналларда янгиликлар чоп этишда давом этмоқда. «Kun.uz» вакилларининг хабар қилишича, сайтга DNS’даги муаммолар туфайли кириб бўлмаяпти.

«Xabar.uz», ўз навбатида, муаммо «Ўзбектелеком» DNS-серверлари ёки коммутаторлари билан боғлиқлигини маълум қилди.

Аммо «Ўзбектелеком» миллий телеком-оператори бу икки сайтдаги муаммоларга алоқадорлигини рад этди.

«Бу ахборот текширилмаган бўлиб, ёлғон характерига эга, негаки кўрсатилган сайтларга ‘Ўзбектелеком’ DNS-серверларида хизмат кўрсатилмайди», — дейилади оператор баёнотида.

«Xabar.uz» айни пайтда «Xabaruz.com» доменида ишлаб турибди.

Манба: daryo.uz