Кремль АҚШ президенти Дональд Трампнинг Россия ва Украина энергетика объектларига ҳужумларни тўхтатиш бўйича келишиб олгани ҳақидаги баёнотини ижобий баҳолади.
Кремль вакили Дмитрий Песков журналистларга:
«Ҳа, биз буни кўряпмиз. Умуман олганда, биз буни жуда яхши ғоя ва яхши ташаббус деб ҳисоблаймиз. Биз америкаликлар билан алоқадамиз. Биз ҳар доим тинч йўл билан ҳал қилиш тарафдоримиз», — деди.
Бироқ Песковнинг таъкидлашича, нефтьни қайта ишлаш заводларининг хавфсиз ишлашини таъминлаш ва нефт маҳсулотлари ишлаб чиқариш ҳажмини ошириш жаҳон энергетикаси муаммоларини ҳал қилмайди.
Унинг сўзларига кўра, асосий муаммо — нефт маҳсулотларини жаҳон бозорларига чиқариш.
«Гап шу нефт маҳсулотларининг жаҳон бозорларига тўсиқсиз киришини таъминлаш ҳақида кетмоқда. Бу ерда нефт ташувчи кемалар учун хавфсиз савдо ва денгиз қатновини таъминлаш зарур», — деди Песков.
Аввалроқ АҚШ президенти Дональд Трамп Truth Social тармоғида:
«Украина Россиянинг энергетика объектларига ҳужум қилмасликка рози бўлди. Россия ҳам худди шундай қилишга рози бўлди!»
деб ёзган эди.
Песковдан фарқли ўлароқ, Трамп жаҳонда дизель ёқилғиси нархининг ошиши асосан Россия ва Украина ўртасидаги уруш билан боғлиқ, Эрондаги вазият билан эмас, деб таъкидлаган.
Ҳозирча на Москва, на Киев АҚШ президентининг бу баёнотини расман тасдиқлаган.
Буқа 300 минг долларга сотилди
"СИ шу ўн йиллик охирига келиб барчамизни ўлдириши мумкин"
Антарктидада 695 миллиард тонна муз тўпланди: олимлар сабабини аниқлади
