Эронда 6 мартдан бери қўлбола арақдан вафот этганлар сони 180 нафарга етди, дея хабар бермоқда ISNA агентлиги.
Форс вилояти фавқулодда вазиятлар бошқармаси бошлиғи Муҳаммад Жавод Муродиённинг маълум қилишича, биргина мазкур вилоятда 6 мартдан бери 427 киши сохта спиртли ичимликлардан заҳарланган. Улардан 65 нафари вафот этган, 14 нафари реанимацияда қолмоқда.
«Афсуски, бундай нохуш ҳолатга алкоголнинг коронавирусга дори экани ҳақида ижтимоий тармоқларда тарқаган миш-мишлар сабаб бўлди», – дейди у.
Охирги кунларда Форс вилоятида ўтказилган назорат тадбирларида 50 минг тонна алкогол олиб қўйилган, қўлбола арақ ишлаб чиқариш ва тарқатиш билан шуғулланганлар қўлга олинган.
