Колумбияда президентга қарши оммавий намойишлар бўлиб ўтди

Колумбияда мамлакатнинг Ал-Қудс (Қуддус) шаҳридаги элчихонаси очилганидан сўнг минглаб фуқаролар кўчаларга чиқди. Намойишчилар ҳукуматнинг Исроил ва АҚШ билан яқинлашувига, шунингдек, янги президентнинг ички сиёсатига қарши норозилик билдирди.

Колумбияда 7 август куни лавозимга киришган президент Абелардо де ла Эсприэлья ҳукуматига қарши илк йирик намойишлар бўлиб ўтди. «Умуммиллий иш ташлаш» деб номланган акциялар Богота, Медельин, Кали, Манисалес, Букараманга, Барранкилья ва Кукута шаҳарларида ташкил этилди.

Намойишларда касаба уюшмалари, талабалар, ўқитувчилар, туб халқлар вакиллари, «Тарихий пакт» сўл коалицияси ҳамда турли жамоат ташкилотлари иштирок этди.

Норозиликнинг асосий сабабларидан бири ҳукуматнинг Исроил билан дипломатик муносабатларни тиклаш ва Колумбиянинг Ал-Қудс (Қуддус) шаҳридаги элчихонасини очиш ҳақидаги қарори бўлди. Намойишчилар Исроилнинг Ғазодаги урушини қоралаб, Боготанинг АҚШ президенти Дональд Трамп маъмурияти билан яқинлашувига қарши чиқди.

Намойишчилар Фаластин байроқларини кўтариб, «Биз сизларнинг орқа ҳовлингиз эмасмиз» ва «АҚШ интервенциячилигига йўқ!» деган ёзувлар туширилган плакатларни олиб юришди. Боготада айрим намойишчилар АҚШ байроғини ҳам ёқиб юборди.

Колумбиянинг Ал-Қудсдаги элчихонаси чоршанба куни очилди. Маросимда мамлакат ташқи ишлар вазири Омар Була иштирок этиб, Исроилни стратегик ҳамкор деб атади.

«Икки мамлакат ўртасидаги дипломатик муносабатлар ҳеч қачон узилмаслиги керак эди», — деди вазир.

Де ла Эсприэлья Исроил билан муносабатларни тиклади. Унинг ўтмишдоши Густаво Петро 2024 йилда Ғазодаги уруш сабабли Исроил билан дипломатик алоқаларни узган эди. Янги маъмурият, шунингдек, Исроил билан эркин савдо тўғрисидаги келишувни амалга қайта киритди.

Фаластин маъмурияти элчихонанинг очилишини қоралаб, бу қадам халқаро ҳуқуққа путур етказишини ва Колумбиянинг Фаластин-Исроил можароси бўйича аввалги дипломатик позициясига зид эканини билдирди.

Намойиш иштирокчилари бюджет харажатларининг қисқартирилиши, аборт қилиш имкониятларини чеклаш режалари, туб халқларга нисбатан сиёсат ва намойишлар тўғрисидаги янги президент фармонига ҳам қарши чиқди.

Ҳужжатда намойишчилар билан мулоқот қилиш устувор ёндашув сифатида белгиланган. Бироқ зўравонлик ҳаракатларида иштирок этаётган шахсларга нисбатан хавфсизлик кучларининг олдиндан мажбурий мулоқот ўтказмасдан тўғридан-тўғри аралашувига ҳам рухсат берилади.

Мухолифат янги қоидалар намойишларни бостириш учун ишлатилиши мумкинлигидан хавотир билдирмоқда.

Колумбиянинг собиқ президенти Густаво Петро Боготадаги Боливар майдонида намойишчилар олдида нутқ сўзлаб, амалдаги давлат раҳбарини фуқароларнинг норозилик билдириш ҳуқуқини чеклашга уринаётганликда айблади.

«Халқ таслим бўлмайди, буни тушуниб ол. Тиранияга айнан шундай қаршилик кўрсатилади. Қадр-қиммат билан, яна ғалаба қозониш истаги билан, қўрқувсиз. Ҳаёт — бизнинг ҳамроҳимиз, ўлим эмас. Халқ таслим бўлмайди», — деди Петро.

Де ла Эсприэлья эса аввалроқ тинч намойишлар фуқароларнинг конституциявий ҳуқуқи эканини таъкидлаган. Бироқ унинг айтишича, бу ҳуқуқ зўравонлик, мулкка зарар етказиш ва шошилинч хизматлар фаолиятига тўсқинлик қилишни қамраб олмайди.

Хавфсизлик чоралари кучайтирилганига қарамай, намойишлар давомида тўқнашувлар содир бўлгани ҳақида хабарлар келиб тушмаган.